umid-e-wasl mein lutf-e-hayat aur bhi hai

umīd-e-vasl meñ lutf-e-hayāt aur bhī hai

charāġh abhī na bujhāo ki raat aur bhī hai

kabhī to jhāñk ke dekho tum apne andar bhī

tumhāre jism meñ ik kā.enāt aur bhī hai

ulajh ke lazzat-e-duniyā meñ ham ye bhuul ga.e

ki is hayāt ke baad ik hayāt aur bhī hai

masarratoñ meñ jo sarmast haiñ vo kyā jāneñ

ḳhushī ke baad ġhamoñ kī barāt aur bhī hai

na vaqt ko na zamāne ko hai qiyām jahāñ

vahīñ ye zindagī-e-be-sabāt aur bhī hai

ḳhabar nahīñ hai bahāroñ meñ rahne vāloñ ko

ki ek mausam-e-sad-hādsāt aur bhī hai

bahut hai naaz tujhe māhtāb-o-anjum par

ik āftāb-e-hazārāñ-sifāt aur bhī hai

ġham-e-jahāñ ko ġham-e-do-jahāñ meñ zam kar do

mujhe yaqīñ hai ki rāh-e-najāt aur bhī hai

vo mutma.in nahīñ ab tak mirī tabāhī se

mirī taraf nigah-e-iltifāt aur bhī hai

jo aarzī hai 'musavvir' use sajānā kyā

use sajāo jo ik kā.enāt aur bhī hai

umid-e-wasl mein lutf-e-hayat aur bhi hai

charagh abhi na bujhao ki raat aur bhi hai

kabhi to jhank ke dekho tum apne andar bhi

tumhaare jism mein ek kaenat aur bhi hai

ulajh ke lazzat-e-duniya mein hum ye bhul gae

ki is hayat ke baad ek hayat aur bhi hai

masarraton mein jo sarmast hain wo kya jaanen

KHushi ke baad ghamon ki baraat aur bhi hai

na waqt ko na zamane ko hai qiyam jahan

wahin ye zindagi-e-be-sabaat aur bhi hai

KHabar nahin hai bahaaron mein rahne walon ko

ki ek mausam-e-sad-hadsat aur bhi hai

bahut hai naz tujhe mahtab-o-anjum par

ek aaftab-e-hazaran-sifat aur bhi hai

gham-e-jahan ko gham-e-do-jahan mein zam kar do

mujhe yaqin hai ki rah-e-najat aur bhi hai

wo mutmain nahin ab tak meri tabahi se

meri taraf nigah-e-iltifat aur bhi hai

jo aarzi hai 'musawwir' use sajaana kya

use sajao jo ek kaenat aur bhi hai