امید وصل میں لطف حیات اور بھی ہے

امید وصل میں لطف حیات اور بھی ہے

چراغ ابھی نہ بجھاؤ کہ رات اور بھی ہے

کبھی تو جھانک کے دیکھو تم اپنے اندر بھی

تمہارے جسم میں اک کائنات اور بھی ہے

الجھ کے لذت دنیا میں ہم یہ بھول گئے

کہ اس حیات کے بعد اک حیات اور بھی ہے

مسرتوں میں جو سرمست ہیں وہ کیا جانیں

خوشی کے بعد غموں کی برات اور بھی ہے

نہ وقت کو نہ زمانے کو ہے قیام جہاں

وہیں یہ زندگیٔ بے ثبات اور بھی ہے

خبر نہیں ہے بہاروں میں رہنے والوں کو

کہ ایک موسم صد حادثات اور بھی ہے

بہت ہے ناز تجھے ماہتاب و انجم پر

اک آفتاب ہزاراں صفات اور بھی ہے

غم جہاں کو غم دو جہاں میں ضم کر دو

مجھے یقیں ہے کہ راہ نجات اور بھی ہے

وہ مطمئن نہیں اب تک مری تباہی سے

مری طرف نگہ التفات اور بھی ہے

جو عارضی ہے مصورؔ اسے سجانا کیا

اسے سجاؤ جو اک کائنات اور بھی ہے