umidon se dil-e-barbaad ko aabaad karta hun

umīdoñ se dil-e-barbād ko ābād kartā huuñ

miTāne ke liye duniyā na.ī ījād kartā huuñ

tirī mī’ād-e-ġham puurī huī ai zindagī ḳhush ho

qafas TuuTe na TuuTe maiñ tujhe āzād kartā huuñ

jafā-kāro mirī mazlūm ḳhāmoshī pe hañste ho

zarā Thahro zarā dam lo abhī fariyād kartā huuñ

maiñ apne dil kā mālik huuñ mirā dil ek bastī hai

kabhī ābād kartā huuñ kabhī barbād kartā huuñ

mulāqāteñ bhī hotī haiñ mulāqātoñ ke baa'd aksar

vo mujh ko bhuul jaate haiñ maiñ un ko yaad kartā huuñ

ḳhudī kī ibtidā ye thī ki apne-āp meñ gum thā

ḳhudī kī intihā ye hai ḳhudā ko yaad kartā huuñ

butoñ ke 'ishq meñ khoyā gayā huuñ varna ai 'aḳhtar'

ḳhudā shāhid hai maiñ aksar ḳhudā ko yaad kartā huuñ

umidon se dil-e-barbaad ko aabaad karta hun

miTane ke liye duniya nai ijad karta hun

teri mi’ad-e-gham puri hui ai zindagi KHush ho

qafas TuTe na TuTe main tujhe aazad karta hun

jafa-karo meri mazlum KHamoshi pe hanste ho

zara Thahro zara dam lo abhi fariyaad karta hun

main apne dil ka malik hun mera dil ek basti hai

kabhi aabaad karta hun kabhi barbaad karta hun

mulaqaten bhi hoti hain mulaqaton ke ba'd aksar

wo mujh ko bhul jate hain main un ko yaad karta hun

KHudi ki ibtida ye thi ki apne-ap mein gum tha

KHudi ki intiha ye hai KHuda ko yaad karta hun

buton ke 'ishq mein khoya gaya hun warna ai 'aKHtar'

KHuda shahid hai main aksar KHuda ko yaad karta hun