امید صبح خیال بہار کیا کیا کچھ

امید صبح خیال بہار کیا کیا کچھ

گنوا کے بیٹھے ہیں ہم جاں فگار کیا کیا کچھ

جنوں قماش تھی اپنی خرد کی دنیا بھی

سو بزم بزم سمیٹا غبار کیا کیا کچھ

وفا خلوص مروت سپاس دل داری

ہوئے ہیں ہم سے گناہ کبار کیا کیا کچھ

تمہیں سرشت الم سے رہا علاقہ کب

یہ ہم ہی تھے کہ ہوئے زیر بار کیا کیا کچھ

یہ مرحلہ بھی عجب ہے کہ بے ثباتیٔ دل

دکھا رہی ہے سر خواب زار کیا کیا کچھ

سکوت شب میں فقط انتظار تھا تیرا

اگا جو دن تو اگے انتظار کیا کیا کچھ

مثیل برگ حنا تھی لہو کی نیرنگی

کہ لخت لخت ابھارے نگار کیا کیا کچھ

شکست و فتح حیات و ممات سود و زیاں

یہ ایک میں ہے مرا انتشار کیا کیا کچھ

زبان رنگ علاقہ قبیل جنس نسب

ہر اک ہے اوڑھے ہوئے اشتہار کیا کیا کچھ

اٹھے جو شیخ و برہمن بہ نام دیر و حرم

نفس نفس میں اٹھے کار زار کیا کیا کچھ

خدا پرستی کہو چاہے خود پرستی کہو

ہیں فی‌ زمانہ یہی کاروبار کیا کیا کچھ

فریب مکر ریا خود نمائی خود غرضی

یہ اجلے چہرے مگر داغدار کیا کیا کچھ

دعا بہار کی بھولے سے مانگ بیٹھے تھے

سو شاخ شاخ کھلے ہیں شرار کیا کیا کچھ