umid-e-subh KHayal-e-bahaar kya kya kuchh

umīd-e-sub.h ḳhayāl-e-bahār kyā kyā kuchh

gañvā ke baiThe haiñ ham jāñ-figār kyā kyā kuchh

junūñ-qimāsh thī apnī ḳhirad kī duniyā bhī

so bazm bazm sameTā ġhubār kyā kyā kuchh

vafā ḳhulūs muravvat sipās dildārī

hue haiñ ham se gunāh-e-kibār kyā kyā kuchh

tumheñ sarisht-e-alam se rahā 'ilāqa kab

ye ham hī the ki hue zer-e-bār kyā kyā kuchh

ye marhala bhī 'ajab hai ki be-sabātī-e-dil

dikhā rahī hai sar-e-ḳhvāb-zār kyā kyā kuchh

sukūt-e-shab meñ faqat intizār thā terā

ugā jo din to uge intizār kyā kyā kuchh

masīl-e-barg-e-hinā thī lahū kī nairañgī

ki laḳht laḳht ubhāre nigār kyā kyā kuchh

shikast-o-fat.h hayāt-o-mamāt sūd-o-ziyāñ

ye ek maiñ hai mirā intishār kyā kyā kuchh

zabān rang 'ilāqa qabīl jins nasab

har ik hai oḌhe hue ishtihār kyā kyā kuchh

uThe jo shaiḳh-o-barahman ba-nām-e-dair-o-haram

nafas nafas meñ uThe kār-zār kyā kyā kuchh

ḳhudā-parastī kaho chāhe ḳhud-parastī kaho

haiñ fī-zamāna yahī kārobār kyā kyā kuchh

fareb makr riyā ḳhud-numā.ī ḳhud-ġharzī

ye ujle chehre magar dāġh-dār kyā kyā kuchh

du'ā bahār kī bhūle se maañg baiThe the

so shāḳh shāḳh khile haiñ sharār kyā kyā kuchh

umid-e-subh KHayal-e-bahaar kya kya kuchh

ganwa ke baiThe hain hum jaan-figar kya kya kuchh

junun-qimash thi apni KHirad ki duniya bhi

so bazm bazm sameTa ghubar kya kya kuchh

wafa KHulus murawwat sipas dildari

hue hain hum se gunah-e-kibar kya kya kuchh

tumhein sarisht-e-alam se raha 'ilaqa kab

ye hum hi the ki hue zer-e-bar kya kya kuchh

ye marhala bhi 'ajab hai ki be-sabaati-e-dil

dikha rahi hai sar-e-KHwab-zar kya kya kuchh

sukut-e-shab mein faqat intizar tha tera

uga jo din to uge intizar kya kya kuchh

masil-e-barg-e-hina thi lahu ki nairangi

ki laKHt laKHt ubhaare nigar kya kya kuchh

shikast-o-fath hayat-o-mamat sud-o-ziyan

ye ek main hai mera intishaar kya kya kuchh

zaban rang 'ilaqa qabil jins nasab

har ek hai oDhe hue ishtihaar kya kya kuchh

uThe jo shaiKH-o-barahman ba-nam-e-dair-o-haram

nafas nafas mein uThe kar-zar kya kya kuchh

KHuda-parasti kaho chahe KHud-parasti kaho

hain fi-zamana yahi karobar kya kya kuchh

fareb makr riya KHud-numai KHud-gharzi

ye ujle chehre magar dagh-dar kya kya kuchh

du'a bahaar ki bhule se mang baiThe the

so shaKH shaKH khile hain sharar kya kya kuchh