ummid-e-wasl us se KHuda ki qasam nahin

ummīd-e-vasl us se ḳhudā kī qasam nahīñ

kahte haiñ arz-e-bosa pe vo dam-ba-dam nahīñ

us kā tavāf karte haiñ ushshāq-e-roz-o-shab

kū-e-sanam bhī rutbe meñ ka.abe se kam nahīñ

mere savāl-e-vasl ko lillāh rad na kar

dekh ai sanam ye sheva-e-ahl-e-karam nahīñ

hūroñ kā tujh meñ husn hai pariyoñ kī shoḳhiyāñ

ai but qasam ḳhudā kī kisī se tū kam nahīñ

yaañ dard-e-dil se mujh ko nahīñ chain ab ghaḌī

un ko qarār shoḳhiyoñ se ek dam nahīñ

nāzāñ hoñ apne baḳht-e-siyah par na kis tarah

ye tīrgī meñ yaar kī zulfoñ se kam nahīñ

āñkheñ jo rone meñ to taḌapne meñ dil hai fard

vo abr se to ye kisī bijlī se kam nahīñ

apne liye maiñ un se rakhūñ ab umiid kyā

suntā huuñ marg-e-ġhair kā kuchh un ko ġham nahīñ

tum imtihān-e-ġhair kabhī karke dekh lo

rāh-e-vafā meñ vo kabhī sābit-qadam nahīñ

jo kaam un ke lab se vo tere qadam se ho

Thokar bhī terī kuchh qum-e-īsā se kam nahīñ

kis dam nahīñ hai yaar kī teġh-e-nigah kī yaad

kis vaqt mere qatl kā sāmāñ baham nahīñ

ham bevafā.iyāñ na kareñge adū kī tarah

tum ko vahī ḳhayāl abas hai vo ham nahīñ

apnī vafā kā zikr hasīnoñ meñ rah gayā

duniyā meñ naam aaj hamārā hai ham nahīñ

āñkheñ jo roiiñ hijr meñ ik hashr ho bapā

ye do habāb nuuh ke tūfāñ se kam nahīñ

mamnūn huuñ ḳhudā kī ināyat kā ai 'fahīm'

rāhat kā mere kaun sā sāmāñ baham nahīñ

ummid-e-wasl us se KHuda ki qasam nahin

kahte hain arz-e-bosa pe wo dam-ba-dam nahin

us ka tawaf karte hain ushshaq-e-roz-o-shab

ku-e-sanam bhi rutbe mein kabe se kam nahin

mere sawal-e-wasl ko lillah rad na kar

dekh ai sanam ye shewa-e-ahl-e-karam nahin

huron ka tujh mein husn hai pariyon ki shoKHiyan

ai but qasam KHuda ki kisi se tu kam nahin

yan dard-e-dil se mujh ko nahin chain ab ghaDi

un ko qarar shoKHiyon se ek dam nahin

nazan hon apne baKHt-e-siyah par na kis tarah

ye tirgi mein yar ki zulfon se kam nahin

aankhen jo rone mein to taDapne mein dil hai fard

wo abr se to ye kisi bijli se kam nahin

apne liye main un se rakhun ab umid kya

sunta hun marg-e-ghair ka kuchh un ko gham nahin

tum imtihan-e-ghair kabhi karke dekh lo

rah-e-wafa mein wo kabhi sabit-qadam nahin

jo kaam un ke lab se wo tere qadam se ho

Thokar bhi teri kuchh qum-e-isa se kam nahin

kis dam nahin hai yar ki tegh-e-nigah ki yaad

kis waqt mere qatl ka saman baham nahin

hum bewafaiyan na karenge adu ki tarah

tum ko wahi KHayal abas hai wo hum nahin

apni wafa ka zikr hasinon mein rah gaya

duniya mein nam aaj hamara hai hum nahin

aankhen jo roin hijr mein ek hashr ho bapa

ye do habab nuh ke tufan se kam nahin

mamnun hun KHuda ki inayat ka ai 'fahim'

rahat ka mere kaun sa saman baham nahin