ummid o yas ne kya kya na gul khilae hain

ummīd o yaas ne kyā kyā na gul khilā.e haiñ

ham ābshār ke badle sarāb laa.e haiñ

havā hai garm udāsī kā zard manzar hai

sabhī daraḳht harī koñpleñ chhupā.e haiñ

kaTe haiñ paañv to hāthoñ ke bal chale uTh kar

misāl-e-mauj tire ham-kanār aa.e haiñ

jahāñ dikhā.ī na detā thā ek Tiila bhī

vahāñ se log uThā kar pahāḌ laa.e haiñ

na ek buuñd ināyat na phuul bhar ḳhushbū

ye kis dayār ke bādal qafas pe chhā.e haiñ

kise hunar kā sila chāhiye magar kuchh log

kahāñ kahāñ se na patthar uThā ke laa.e haiñ

azal se ham ko 'hasan' intizār-e-sabza hai

jale haiñ baaġh to paude na.e lagā.e haiñ

ummid o yas ne kya kya na gul khilae hain

hum aabshaar ke badle sarab lae hain

hawa hai garm udasi ka zard manzar hai

sabhi daraKHt hari konplen chhupae hain

kaTe hain panw to hathon ke bal chale uTh kar

misal-e-mauj tere ham-kanar aae hain

jahan dikhai na deta tha ek Tila bhi

wahan se log uTha kar pahaD lae hain

na ek bund inayat na phul bhar KHushbu

ye kis dayar ke baadal qafas pe chhae hain

kise hunar ka sila chahiye magar kuchh log

kahan kahan se na patthar uTha ke lae hain

azal se hum ko 'hasan' intizar-e-sabza hai

jale hain bagh to paude nae lagae hain