ummid par hamari ye duniya khari nahin

ummīd par hamārī ye duniyā kharī nahīñ

phir bhī to us ko paane kī ḳhvāhish mirī nahīñ

be-vaj.h gul-ruḳhoñ se mirī be-ruḳhī kahāñ

mere junūn-e-shauq ke qābil parī nahīñ

taskīñ mile bhī dīda-e-hairāñ ko kis tarah

shīshagarī nahīñ kahīñ jalvagarī nahīñ

bad-rañg sī bahār hai fasl-e-bahār meñ

bashshāsh dil nahīñ hai tabī.at harī nahīñ

lagtā hai aaj shahr ke hālāt Thiik haiñ

masjid vagarna kal kī tarah kyuuñ bharī nahīñ

hālāñki mere jurm pe parde paḌe rahe

dil kī malāmatoñ se magar maiñ barī nahīñ

dhartī pe dikh rahe haiñ gunāhoñ ke ab asar

'āzam' kahīñ to ḳhushkī kahīñ par tarī nahīñ

ummid par hamari ye duniya khari nahin

phir bhi to us ko pane ki KHwahish meri nahin

be-wajh gul-ruKHon se meri be-ruKHi kahan

mere junun-e-shauq ke qabil pari nahin

taskin mile bhi dida-e-hairan ko kis tarah

shishagari nahin kahin jalwagari nahin

bad-rang si bahaar hai fasl-e-bahaar mein

bashshash dil nahin hai tabiat hari nahin

lagta hai aaj shahr ke haalat Thik hain

masjid wagarna kal ki tarah kyun bhari nahin

haalanki mere jurm pe parde paDe rahe

dil ki malamaton se magar main bari nahin

dharti pe dikh rahe hain gunahon ke ab asar

'azam' kahin to KHushki kahin par tari nahin