ummid unki kam hi sahi aarzu to hai

ummīd un kī kam hī sahī aarzū to hai

manzil hameñ mile na mile justujū to hai

amrit kī aarzū ne kaho tum ko kyā diyā

ham log zahr-nosh sahī aabrū to hai

duniyā meñ ham kuchh aise tahī-dast bhī nahīñ

ajdād kā hamārī ragoñ meñ lahū to hai

ahbāb ko to maslahat-andeshiyoñ se kaam

ā.īna sāf-go hī sahī rū-ba-rū to hai

dīvāna pā-shikasta o shorīda-sar sahī

lekin ba-pās-e-husn-e-vafā surḳh-rū to hai

ai dost aaj kyoñ haiñ ye vahshat-navāziyāñ

haañ ham nahīñ haiñ sāhib-e-idrāk tū to hai

'tālib' ye kyā zarūr ki ho zikr-e-ḳhair hī

yāroñ ke darmiyān tirī guftugū to hai

ummid un ki kam hi sahi aarzu to hai

manzil hamein mile na mile justuju to hai

amrit ki aarzu ne kaho tum ko kya diya

hum log zahr-nosh sahi aabru to hai

duniya mein hum kuchh aise tahi-dast bhi nahin

ajdad ka hamari ragon mein lahu to hai

ahbab ko to maslahat-andeshiyon se kaam

aaina saf-go hi sahi ru-ba-ru to hai

diwana pa-shikasta o shorida-sar sahi

lekin ba-pas-e-husn-e-wafa surKH-ru to hai

ai dost aaj kyon hain ye wahshat-nawaziyan

han hum nahin hain sahib-e-idrak tu to hai

'talib' ye kya zarur ki ho zikr-e-KHair hi

yaron ke darmiyan teri guftugu to hai