umr bhar chalta rahun ye hadisa rahne diya

umr bhar chaltā rahūñ ye hādisa rahne diyā

us ne manzil chhīn lī aur rāsta rahne diyā

is tarah us ne kiyā bīmārī-e-ġham kā ilaaj

achchhā hone par bhī mohtāj-e-davā rahne diyā

jab ga.e the merī rāhoñ meñ jalā kar tum charāġh

āñdhiy.oñ ko kis liye mujh se ḳhafā rahne diyā

chāhe jhūTā hī sahī us ne dilāsa to diyā

kam se kam jiine kā mere silsila rahne diyā

thā haqīqat par fidā sone se bhī Dartā rahā

umr bhar āñkhoñ ko ḳhvāboñ se judā rahne diyā

yuuñ kiyā mujh par sitam āḳhir terī pahchān ne

merī hī pahchān ko mujh se judā rahne diyā

ḳhud se jab andāz milne kā nahīñ thā hausla

aa.ina chehre ke aage kyoñ rakhā rahne diyā

umr bhar chalta rahun ye hadisa rahne diya

us ne manzil chhin li aur rasta rahne diya

is tarah us ne kiya bimari-e-gham ka ilaj

achchha hone par bhi mohtaj-e-dawa rahne diya

jab gae the meri rahon mein jala kar tum charagh

aandhiyon ko kis liye mujh se KHafa rahne diya

chahe jhuTa hi sahi us ne dilasa to diya

kam se kam jine ka mere silsila rahne diya

tha haqiqat par fida sone se bhi Darta raha

umr bhar aankhon ko KHwabon se juda rahne diya

yun kiya mujh par sitam aaKHir teri pahchan ne

meri hi pahchan ko mujh se juda rahne diya

KHud se jab andaz milne ka nahin tha hausla

aaina chehre ke aage kyon rakha rahne diya