umr bhar chalte rahe hum waqt ki talwar par

umr bhar chalte rahe ham vaqt kī talvār par

parvarish paa.ī hai apne ḳhuun hī kī dhaar par

chāhne vaale kī ik ġhalatī se barham ho gayā

faḳhr thā kitnā use ḳhud pyaar ke me.aar par

raat gahrī merī tanhā.ī kā sāgar aur phir

terī yādoñ ke sulagte diip har mañjdhār par

shaam aa.ī aur sab shāḳhoñ kī galiyāñ so ga.iiñ

maut kā saayā sā mañDlāne lagā ashjār par

ḳhalvat-e-shab meñ ye aksar sochtā kyuuñ huuñ ki chāñd

nuur kā bosa hai goyā raat ke ruḳhsār par

sāl-e-nau aatā hai to mahfūz kar letā huuñ maiñ

kuchh purāne se calender zehn kī dīvār par

zindagī āzād pahle yuuñ kabhī tanhā na thī

aadmī bahtā thā yūñhī vaqt kī raftār par

umr bhar chalte rahe hum waqt ki talwar par

parwarish pai hai apne KHun hi ki dhaar par

chahne wale ki ek ghalati se barham ho gaya

faKHr tha kitna use KHud pyar ke mear par

raat gahri meri tanhai ka sagar aur phir

teri yaadon ke sulagte dip har manjdhaar par

sham aai aur sab shaKHon ki galiyan so gain

maut ka saya sa manDlane laga ashjar par

KHalwat-e-shab mein ye aksar sochta kyun hun ki chand

nur ka bosa hai goya raat ke ruKHsar par

sal-e-nau aata hai to mahfuz kar leta hun main

kuchh purane se calender zehn ki diwar par

zindagi aazad pahle yun kabhi tanha na thi

aadmi bahta tha yunhi waqt ki raftar par