umr bhar Dolti yaadon ki ziya se khele

'umr bhar Doltī yādoñ kī ziyā se khele

sham'-e-ummīd liye tez havā se khele

ham ne har tarah se dil ḳhuun kiyā hai apnā

ātish-e-mai se kabhī jurm-e-vafā se khele

tū vo ik aag jise haath lagā.e na bane

dil vo dīvāna ki is sail-e-balā se khele

uḌ gayā rang ruḳh-e-mausam-e-gul kā kyā kyā

ḳhushk patte jo kabhī bād-e-sabā se khele

kis ne zanjīr kiyā abr-e-ravāñ ko shafqat

fasl-e-gul aa.ī to ham apnī qabā se khele

'umr bhar Dolti yaadon ki ziya se khele

sham'-e-ummid liye tez hawa se khele

hum ne har tarah se dil KHun kiya hai apna

aatish-e-mai se kabhi jurm-e-wafa se khele

tu wo ek aag jise hath lagae na bane

dil wo diwana ki is sail-e-bala se khele

uD gaya rang ruKH-e-mausam-e-gul ka kya kya

KHushk patte jo kabhi baad-e-saba se khele

kis ne zanjir kiya abr-e-rawan ko shafqat

fasl-e-gul aai to hum apni qaba se khele