umr bhar ek hi kirdar se Dar lagta hai

umr bhar ek hī kirdār se Dar lagtā hai

aadmī huuñ mujhe takrār se Dar lagtā hai

aañkh thak jaatī hai chehroñ kā ta.āqub karte

tez chaltā huuñ to raftār se Dar lagtā hai

chaukhaTe bechne vaale tirī kun ras āvāz

khīñch bhī laa.e to bāzār se Dar lagtā hai

phir koī zaḳhm ki kuchh din hameñ pur-kār rakhe

ishq ko fursat-e-be-kār se Dar lagtā hai

kaun kis vaqt badal jaa.e ḳhudā jāntā hai

ḳhalq aur ḳhalq ke me.aar se Dar lagtā hai

dil hai malbe se churāyā huā zevar 'tālib'

bik bhī jaa.e to ḳharīdār se Dar lagtā hai

umr bhar ek hi kirdar se Dar lagta hai

aadmi hun mujhe takrar se Dar lagta hai

aankh thak jati hai chehron ka taaqub karte

tez chalta hun to raftar se Dar lagta hai

chaukhaTe bechne wale teri kun ras aawaz

khinch bhi lae to bazar se Dar lagta hai

phir koi zaKHm ki kuchh din hamein pur-kar rakhe

ishq ko fursat-e-be-kar se Dar lagta hai

kaun kis waqt badal jae KHuda jaanta hai

KHalq aur KHalq ke mear se Dar lagta hai

dil hai malbe se churaya hua zewar 'talib'

bik bhi jae to KHaridar se Dar lagta hai