umr bhar ek si uljhan to nahin ban sakte

umr bhar ek sī uljhan to nahīñ ban sakte

dost ban jaa.eñ ki dushman to nahīñ ban sakte

ham ko ma.alūm hai tum kyā nahīñ ban paate ho

dhuup ban jaate ho sāvan to nahīñ ban sakte

maiñ ne dekhā hai vo insān tumhāre andar

raam ban jāoge rāvan to nahīñ ban sakte

naqd sāñsoñ ke liye dil se mohabbat karnā

ham kabhī qarz kī dhaḌkan to nahīñ ban sakte

har shikan aaj hai bistar kī tumhārī ḳhātir

tum mire chain ke dushman to nahīñ ban sakte

roz ik jaisī adākārī na hogī ham se

tum bhī ik raat kī dulhan to nahīñ ban sakte

ek jaisī to nahīñ hotī hai saarī duniyā

sab tire ruup kā darpan to nahīñ ban sakte

maiñ hī ban jā.ūñgā kuchh der ko un ke jaisā

mere bachche mirā bachpan to nahīñ ban sakte

haq talab karte haiñ baḳhshish to nahīñ māñgte haiñ

ham tirī bhiik kā bartan to nahīñ ban sakte

umr bhar ek si uljhan to nahin ban sakte

dost ban jaen ki dushman to nahin ban sakte

hum ko malum hai tum kya nahin ban pate ho

dhup ban jate ho sawan to nahin ban sakte

main ne dekha hai wo insan tumhaare andar

ram ban jaoge rawan to nahin ban sakte

naqd sanson ke liye dil se mohabbat karna

hum kabhi qarz ki dhaDkan to nahin ban sakte

har shikan aaj hai bistar ki tumhaari KHatir

tum mere chain ke dushman to nahin ban sakte

roz ek jaisi adakari na hogi hum se

tum bhi ek raat ki dulhan to nahin ban sakte

ek jaisi to nahin hoti hai sari duniya

sab tere rup ka darpan to nahin ban sakte

main hi ban jaunga kuchh der ko un ke jaisa

mere bachche mera bachpan to nahin ban sakte

haq talab karte hain baKHshish to nahin mangte hain

hum teri bhik ka bartan to nahin ban sakte