عمر بھر غم سے ہم آغوش رہے ہم طبعاً

عمر بھر غم سے ہم آغوش رہے ہم طبعاً

بے ارادہ کبھی ہنسنا بھی پڑا مصلحتاً

کیا کیا تم نے کہ پیمان وفا توڑ دیا

دل سا اک شہر فنا ہو گیا آناً‌ فاناً

کینہ فطرت ہی نہ تھے مجھ کو مٹانے والے

ان میں کچھ لوگ تو معصوم بھی تھے تم مثلاً

اس توقع میں کہ شاید کوئی مڑ کر دیکھے

بارہا رک کے چلے چل کے رکے ہم قصداً

دل بہر حال نہ ملنا تھا کسی سے نہ ملا

ساتھ بیٹھے بھی زمانے سے ملے بھی رسماً

وہ نہیں ہیں تو کسی طور نہیں دل کو قرار

زندگی ویسے تو معمول پہ ہے تقریباً

زیست اک بوجھ رہی ان سے بچھڑ کر افضلؔ

یہ الگ بات کہ جینے کو جیے مجبوراً