عمر بھر کی کوشش ناکام پر ہنستا ہوں میں

عمر بھر کی کوشش ناکام پر ہنستا ہوں میں

اس کے ہر آغاز ہر انجام پر ہنستا ہوں میں

یہ بھی گردش میں ہے ساقی میری قسمت کی طرح

تیرے میخانے میں دور جام پر ہنستا ہوں میں

شادمانی وصل کی ہو یا ہو فرقت کا الم

جو بھی مل جائے اسی انعام پر ہنستا ہوں میں

تہمتیں مجھ پر ہیں کتنی اے جمال روئے دوست

اور میرا دل کہ ہر الزام پر ہنستا ہوں میں

دن تو کٹ جاتا ہے اخترؔ پاؤں کے چکر کے ساتھ

جو نہ پہنچے صبح تک اس شام پر ہنستا ہوں میں