عمر بھر کس نے روا رسم وفا رکھی ہے

عمر بھر کس نے روا رسم وفا رکھی ہے

طاق نسیاں میں ہر اک دل کی صدا رکھی ہے

کل جسے جاتے ہوئے چھیڑ دیا تھا تو نے

وہ کلی آج کہاں باد صبا رکھی ہے

تو نے جو بات کہی تھی وہ ہمیں یاد نہیں

تیری تصویر تو کمرے میں لگا رکھی ہے

بے نیازانہ کوئی چھوڑ گیا دنیا کو

اور یہاں آس کے دامن میں دعا رکھی ہے

حق کو حق دار سے پہلے ہی اچک لیتے ہیں

اس طرح ہم نے بغاوت کی بنا رکھی ہے

ہم تو کہتے ہیں اسے آج بھی رحمان و رحیم

جس نے ہر حال میں جینے کی سزا رکھی ہے