umr bhar pesh-e-nazar mah-e-tamam aate rahe

umr bhar pesh-e-nazar māh-e-tamām aate rahe

chand chehre ā.īna-ḳhāne ke kaam aate rahe

chand qatre bhī na Tapke ḳhvāhishoñ kī ret par

kaise kaise abr the bālā-e-bām aate rahe

mere maazī ke ufuq par chand jugnū the ki jo

haal kī tīra-shabī meñ mere kaam aate rahe

maiñ havas ke gird chāhat kā hunar bantā rahā

us ke ḳhat merī vafādārī ke naam aate rahe

haa.e vo shīrīñ tamannā aur vo tiflāna ḳhū

ham sadā jis ke liye ḳhud zer-e-dām aate rahe

tum hisār-e-vaqt meñ sūraj bane baiThe rahe

aur gardish ke liye ḳhud sub.h o shaam aate rahe

umr bhar ḳhvāboñ kī manzil kā safar jaarī rahā

zindagī bhar tajraboñ ke zaḳhm kaam aate rahe

umr bhar pesh-e-nazar mah-e-tamam aate rahe

chand chehre aaina-KHane ke kaam aate rahe

chand qatre bhi na Tapke KHwahishon ki ret par

kaise kaise abr the baala-e-baam aate rahe

mere mazi ke ufuq par chand jugnu the ki jo

haal ki tira-shabi mein mere kaam aate rahe

main hawas ke gird chahat ka hunar banta raha

us ke KHat meri wafadari ke nam aate rahe

hae wo shirin tamanna aur wo tiflana KHu

hum sada jis ke liye KHud zer-e-dam aate rahe

tum hisar-e-waqt mein suraj bane baiThe rahe

aur gardish ke liye KHud subh o sham aate rahe

umr bhar KHwabon ki manzil ka safar jari raha

zindagi bhar tajrabon ke zaKHm kaam aate rahe