umr-e-abad se KHizr ko be-zar dekh kar

umr-e-abad se ḳhizr ko be-zār dekh kar

ḳhush hoñ fusūn-e-nargis-e-bīmār dekh kar

kyā jalva-gāh-e-hasrat-e-nazzāra hai bahisht

hairāñ huuñ sūrat-e-dar-o-dīvār dekh kar

baada ba-qadr-e-zarf sahī rasm-e-mai-kada

saaqī nazākat-e-dil-e-mai-ḳhvār dekh kar

ab justujū-e-dost kī manzil kahīñ bhī ho

ham chal paḌe haiñ raah ko dushvār dekh kar

shāyān-e-jurm-e-ishq na thī qaid-e-zindagī

jī shaad ho gayā rasan-o-dār dekh kar

ab is se kyā ġharaz ye haram hai ki dair hai

baiThe haiñ ham to sāya-e-dīvār dekh kar

ab hashr tak hijāb-nashīñ hai nigāh-e-shauq

chhupnā thā rañg-e-hasrat-e-dīdār dekh kar

rāz-e-faroġh-e-āḳhir-e-shab kuchh na khul sakā

kyuuñ ḳhush hai sham' sub.h ke āsār dekh kar

sāz-e-ġhazal uThā hī liyā ham ne ai 'ravish'

is chashm-e-nīm-bāz kā isrār dekh kar

umr-e-abad se KHizr ko be-zar dekh kar

KHush hon fusun-e-nargis-e-bimar dekh kar

kya jalwa-gah-e-hasrat-e-nazzara hai bahisht

hairan hun surat-e-dar-o-diwar dekh kar

baada ba-qadr-e-zarf sahi rasm-e-mai-kada

saqi nazakat-e-dil-e-mai-KHwar dekh kar

ab justuju-e-dost ki manzil kahin bhi ho

hum chal paDe hain rah ko dushwar dekh kar

shayan-e-jurm-e-ishq na thi qaid-e-zindagi

ji shad ho gaya rasan-o-dar dekh kar

ab is se kya gharaz ye haram hai ki dair hai

baiThe hain hum to saya-e-diwar dekh kar

ab hashr tak hijab-nashin hai nigah-e-shauq

chhupna tha rang-e-hasrat-e-didar dekh kar

raaz-e-farogh-e-aKHir-e-shab kuchh na khul saka

kyun KHush hai sham' subh ke aasar dekh kar

saz-e-ghazal uTha hi liya hum ne ai 'rawish'

is chashm-e-nim-baz ka israr dekh kar