umr-e-fani ko hayat-e-jawidan samjha tha main

umr-e-fānī ko hayāt-e-jāvidāñ samjhā thā maiñ

thī ḳhizāñ jis ko bahār-e-gulsitāñ samjhā thā maiñ

daam ham-rang-e-zamīñ hai aur vahī sayyād bhī

apnī aahoñ ko harīf-e-āsmāñ samjhā thā maiñ

kis tarah ab kar sake koī kisī par e'timād

rāhzan the jin ko mīr-e-kārvāñ samjhā thā maiñ

ḳhaar ġhunche ban ga.e aur phuul angāre bane

terī duniyā ko to yā-rab gulsitāñ samjhā thā maiñ

ḳhāna-e-dil meñ na un se ho sakī kuchh raushnī

dāġh-hā-e-dil ko apne kahkashāñ samjhā thā maiñ

dast-o-pā ne dī shahādat hashr meñ mere ḳhilāf

zindagī ke sāthiyoñ ko be-zabāñ samjhā thā maiñ

ab tirī marzī ho jaisī baḳhsh de yā de sazā

terī rahmat ko ilāhī be-karāñ samjhā thā maiñ

aaj us ko le ga.ī bād-e-sabā mahbūb tak

ḳhaak vo merī ki jis ko rā.egāñ samjhā thā maiñ

ālam-e-ġhurbat hai maiñ huuñ aur nahīñ koī 'zakī'

hai haqīqat ab jise vahm-o-gumāñ samjhā thā maiñ

umr-e-fani ko hayat-e-jawidan samjha tha main

thi KHizan jis ko bahaar-e-gulsitan samjha tha main

dam ham-rang-e-zamin hai aur wahi sayyaad bhi

apni aahon ko harif-e-asman samjha tha main

kis tarah ab kar sake koi kisi par e'timad

rahzan the jin ko mir-e-karwan samjha tha main

KHar ghunche ban gae aur phul angare bane

teri duniya ko to ya-rab gulsitan samjha tha main

KHana-e-dil mein na un se ho saki kuchh raushni

dagh-ha-e-dil ko apne kahkashan samjha tha main

dast-o-pa ne di shahadat hashr mein mere KHilaf

zindagi ke sathiyon ko be-zaban samjha tha main

ab teri marzi ho jaisi baKHsh de ya de saza

teri rahmat ko ilahi be-karan samjha tha main

aaj us ko le gai baad-e-saba mahbub tak

KHak wo meri ki jis ko raegan samjha tha main

aalam-e-ghurbat hai main hun aur nahin koi 'zaki'

hai haqiqat ab jise wahm-o-guman samjha tha main