عمر فانی کو حیات جاوداں سمجھا تھا میں

عمر فانی کو حیات جاوداں سمجھا تھا میں

تھی خزاں جس کو بہار گلستاں سمجھا تھا میں

دام ہم رنگ زمیں ہے اور وہی صیاد بھی

اپنی آہوں کو حریف آسماں سمجھا تھا میں

کس طرح اب کر سکے کوئی کسی پر اعتماد

راہزن تھے جن کو میر کارواں سمجھا تھا میں

خار غنچے بن گئے اور پھول انگارے بنے

تیری دنیا کو تو یا رب گلستاں سمجھا تھا میں

خانۂ دل میں نہ ان سے ہو سکی کچھ روشنی

داغہائے دل کو اپنے کہکشاں سمجھا تھا میں

دست و پا نے دی شہادت حشر میں میرے خلاف

زندگی کے ساتھیوں کو بے زباں سمجھا تھا میں

اب تری مرضی ہو جیسی بخش دے یا دے سزا

تیری رحمت کو الٰہی بے کراں سمجھا تھا میں

آج اس کو لے گئی باد صبا محبوب تک

خاک وہ میری کہ جس کو رائیگاں سمجھا تھا میں

عالم غربت ہے میں ہوں اور نہیں کوئی ذکیؔ

ہے حقیقت اب جسے وہم و گماں سمجھا تھا میں