عمر رفتہ میں یوں تو کیا نہ ہوا

عمر رفتہ میں یوں تو کیا نہ ہوا

صرف اک تو ہے جو مرا نہ ہوا

جان ہم نے نکال کر رکھ دی

پھر بھی اظہار مدعا نہ ہوا

آج طرحی نشست تھی لیکن

وہ نہ آئے مقابلہ نہ ہوا

پھول جھڑتے ہیں لب جو ہلتے ہیں

گالیاں کھا کے بے مزہ نہ ہوا

منتظر ہوں میں کتنی مدت سے

تیرا وعدہ کبھی وفا نہ ہوا

تو ہی اے دوست اک میرا نہ ہوا

زیر افلاک ورنہ کیا نہ ہوا

کوئی پہونچا نہیں ہے ساحل پر

نا خدائی کا پھر گلہ نہ ہوا

کاٹ دی میکدے میں عمر دراز

رند تھا شادؔ پارسا نہ ہوا