umr-e-rafta mein yun to kya na hua

umr-e-rafta meñ yuuñ to kyā na huā

sirf ik tū hai jo mirā na huā

jaan ham ne nikāl kar rakh dī

phir bhī iz.hār-e-mudda.ā na huā

aaj tarhī nishast thī lekin

vo na aa.e muqābla na huā

phuul jhaḌte haiñ lab jo hilte haiñ

gāliyāñ khā ke be-maza na huā

muntazir huuñ maiñ kitnī muddat se

terā va.ada kabhī vafā na huā

tū hī ai dost ik merā na huā

zer-e-aflāk varna kyā na huā

koī pahūñchā nahīñ hai sāhil par

nā-ḳhudā.ī kā phir gila na huā

kaaT dī mai-kade meñ umr-e-darāz

rind thā 'shād' pārsā na huā

umr-e-rafta mein yun to kya na hua

sirf ek tu hai jo mera na hua

jaan hum ne nikal kar rakh di

phir bhi izhaar-e-muddaa na hua

aaj tarhi nishast thi lekin

wo na aae muqabla na hua

phul jhaDte hain lab jo hilte hain

galiyan kha ke be-maza na hua

muntazir hun main kitni muddat se

tera wada kabhi wafa na hua

tu hi ai dost ek mera na hua

zer-e-aflak warna kya na hua

koi pahuncha nahin hai sahil par

na-KHudai ka phir gila na hua

kaT di mai-kade mein umr-e-daraaz

rind tha 'shad' parsa na hua