umr gai ulfat-e-zar ji se ilahi na gai

umr ga.ī ulfat-e-zar jī se ilāhī na ga.ī

mū safed ho ga.e par dil kī siyāsī na ga.ī

jī meñ Thānā thā ki ham hijr meñ jiine ke nahīñ

mar ga.e aah ye baat ham se nibāhī na ga.ī

umr ga.ī hijr meñ dil kartā hai mazkūr-e-visāl

baat ab tak yahī dīvāne kī vaahī na ga.ī

jī gavārā nahīñ kartā ki karūñ minnat-e-ḳhalq

ho ga.e garche gadā dil se vo shāhī na ga.ī

duḳhtar-e-raz se faqat meñ nahīñ mahfūz 'huzūr'

kaun majlis hai ki jis meñ ye sarāhī na ga.ī

umr gai ulfat-e-zar ji se ilahi na gai

mu safed ho gae par dil ki siyasi na gai

ji mein Thana tha ki hum hijr mein jine ke nahin

mar gae aah ye baat hum se nibahi na gai

umr gai hijr mein dil karta hai mazkur-e-visal

baat ab tak yahi diwane ki wahi na gai

ji gawara nahin karta ki karun minnat-e-KHalq

ho gae garche gada dil se wo shahi na gai

duKHtar-e-raz se faqat mein nahin mahfuz 'huzur'

kaun majlis hai ki jis mein ye sarahi na gai