umr guzri rahguzar ke aas-pas

umr guzrī rahguzar ke ās-pās

raqs karte us nazar ke ās-pās

zulf khultī hai to uThtā hai dhuāñ

ābshār-e-chashm-e-tar ke ās-pās

kauñdtī haiñ bijliyāñ barsāt meñ

tā.ir-e-be-bāl-o-par ke ās-pās

raat bhar āvāra patte aur havā

raqs karte haiñ shajar ke ās-pās

chhoḌ aayā huuñ matā-e-jāñ kahīñ

ġhāliban us rahguzar ke ās-pās

baal bikhrā.e ye būḌhī chāñdnī

DhūñDtī hai kyā khañDar ke ās-pās

is galī meñ ek laḌkā aaj bhī

ghūmtā rahtā hai ghar ke ās-pās

ek sūrat-āshnā saa.e kī dhuup

paḌ rahī hai bām-o-dar ke ās-pās

kaise pur-asrār chehre haiñ 'rasā'

ḳhvāb-gāh-e-shīsha-gar ke ās-pās

umr guzri rahguzar ke aas-pas

raqs karte us nazar ke aas-pas

zulf khulti hai to uThta hai dhuan

aabshaar-e-chashm-e-tar ke aas-pas

kaundti hain bijliyan barsat mein

tair-e-be-baal-o-par ke aas-pas

raat bhar aawara patte aur hawa

raqs karte hain shajar ke aas-pas

chhoD aaya hun mata-e-jaan kahin

ghaaliban us rahguzar ke aas-pas

baal bikhrae ye buDhi chandni

DhunDti hai kya khanDar ke aas-pas

is gali mein ek laDka aaj bhi

ghumta rahta hai ghar ke aas-pas

ek surat-ashna sae ki dhup

paD rahi hai baam-o-dar ke aas-pas

kaise pur-asrar chehre hain 'rasa'

KHwab-gah-e-shisha-gar ke aas-pas