umr ka sath nibhaya hai is andaz ke sath

umr kā saath nibhāyā hai is andāz ke saath

jaise kartā ho vafā koī daġhābāz ke saath

raat ārām se guzrī ho ki dushvārī se

har sahar uḌ ke chale ham na.ī parvāz ke saath

haar ke TuuT ke pahle hī qadam par gir jaa.eñ

ham agar joḌ leñ anjām ko āġhāz ke saath

maiñ nahīñ shāh-jahāñ par ye tamanna hai zarūr

dafn kar denā mujhe bhī mirī mumtāz ke saath

naġhma-o-sher ke sangam pe nahā le duniyā

mere ash.ār sune gar tirī āvāz ke saath

nāz-bardāriyāñ us shoḳh kī allāh allāh

phuul qadmoñ pe bikharte haiñ baḌe naaz ke saath

naġhma dilkash ho to har tarah asar kartā hai

kabhī āvāz ke hamrāh kabhī saaz ke saath

umr ka sath nibhaya hai is andaz ke sath

jaise karta ho wafa koi daghabaz ke sath

raat aaram se guzri ho ki dushwari se

har sahar uD ke chale hum nai parwaz ke sath

haar ke TuT ke pahle hi qadam par gir jaen

hum agar joD len anjam ko aaghaz ke sath

main nahin shah-jahan par ye tamanna hai zarur

dafn kar dena mujhe bhi meri mumtaz ke sath

naghma-o-sher ke sangam pe naha le duniya

mere ashaar sune gar teri aawaz ke sath

naz-bardariyan us shoKH ki allah allah

phul qadmon pe bikharte hain baDe naz ke sath

naghma dilkash ho to har tarah asar karta hai

kabhi aawaz ke hamrah kabhi saz ke sath