umr ke aangan mein belen ban ke phaila koi KHwab

umr ke āñgan meñ beleñ ban ke phailā koī ḳhvāb

jaise jiine ke liye kaafī ho tanhā koī ḳhvāb

sochiye kyā mauj-e-gul se bhī koī lab tar huā

dekhiye sāhil pe rah jaa.e na pyāsā koī ḳhvāb

rang-o-sūrat do alag shaḳhsiyyateñ haiñ is liye

donoñ kahte haiñ hameñ diije hamārā koī ḳhvāb

vāhimoñ kī zad se bachne ko safar jaarī rakho

tum zarā Thahre ki saaya ban ke uljhā koī ḳhvāb

phir dhaḌakte haiñ dil-e-insāñ meñ fardā ke ḳhayāl

phir havāoñ ne zamīñ par lā utārā koī ḳhvāb

us ko ḳhvāboñ se ziyāda rat-jagoñ kā shauq thā

us kī palkoñ par isī baa.is na Thahrā koī ḳhvāb

sang-pāroñ kī zabāñ hotī to shāyad māñgte

koī chehra koī paikar koī sho.ala koī ḳhvāb

kyā tamāsha-gāh meñ us ke liye manzar na the

yā use masrūf rakhtā hai usī kā koī ḳhvāb

shor-e-duniyā meñ sisaktī hai sadā-e-dil kahīñ

zindagī tashkīl de naġhmāt jaisā koī ḳhvāb

umr ke aangan mein belen ban ke phaila koi KHwab

jaise jine ke liye kafi ho tanha koi KHwab

sochiye kya mauj-e-gul se bhi koi lab tar hua

dekhiye sahil pe rah jae na pyasa koi KHwab

rang-o-surat do alag shaKHsiyyaten hain is liye

donon kahte hain hamein dije hamara koi KHwab

wahimon ki zad se bachne ko safar jari rakho

tum zara Thahre ki saya ban ke uljha koi KHwab

phir dhaDakte hain dil-e-insan mein farda ke KHayal

phir hawaon ne zamin par la utara koi KHwab

us ko KHwabon se ziyaada rat-jagon ka shauq tha

us ki palkon par isi bais na Thahra koi KHwab

sang-paron ki zaban hoti to shayad mangte

koi chehra koi paikar koi shoala koi KHwab

kya tamasha-gah mein us ke liye manzar na the

ya use masruf rakhta hai usi ka koi KHwab

shor-e-duniya mein sisakti hai sada-e-dil kahin

zindagi tashkil de naghmat jaisa koi KHwab