umr ko karti hain pamal barabar yaaden

'umr ko kartī haiñ pāmāl barābar yādeñ

marne detī haiñ na jiine ye sitamgar yādeñ

haiñ kabhī ḳhūn-e-tamannā kī shanāvar yādeñ

shāḳh-e-dil par haiñ kabhī barg-e-gul-e-tar yādeñ

himmat-e-koh-kanī par bhī kabhī bhārī haiñ

aur tultī haiñ kabhī nok-e-mizha par yādeñ

thak ke duniyā se agar kījiye ḳhvāboñ kī talāsh

niiñd uḌā detī haiñ afsāne sunā kar yādeñ

raah bhūle hue sayyāh ko tanhā pā kar

luuT letī haiñ miTā detī haiñ chhup kar yādeñ

ahd-e-rafta ke pur-asrār ghane jangal meñ

phūñk kar sehr banā detī haiñ patthar yādeñ

koī ḳhud-rafta-o-gum-gashta bhaTaktā hai jahāñ

ajnabī ban ke vahāñ miltī haiñ aksar yādeñ

jab bhī maazī ke dayāroñ se guzar hotā hai

kāsa-e-chashm liye phirtī haiñ dar-dar yādeñ

'umr ko karti hain pamal barabar yaaden

marne deti hain na jine ye sitamgar yaaden

hain kabhi KHun-e-tamanna ki shanawar yaaden

shaKH-e-dil par hain kabhi barg-e-gul-e-tar yaaden

himmat-e-koh-kani par bhi kabhi bhaari hain

aur tulti hain kabhi nok-e-mizha par yaaden

thak ke duniya se agar kijiye KHwabon ki talash

nind uDa deti hain afsane suna kar yaaden

rah bhule hue sayyah ko tanha pa kar

luT leti hain miTa deti hain chhup kar yaaden

ahd-e-rafta ke pur-asrar ghane jangal mein

phunk kar sehr bana deti hain patthar yaaden

koi KHud-rafta-o-gum-gashta bhaTakta hai jahan

ajnabi ban ke wahan milti hain aksar yaaden

jab bhi mazi ke dayaron se guzar hota hai

kasa-e-chashm liye phirti hain dar-dar yaaden