un aankhon ka mujhse koi wada to nahin hai

un āñkhoñ kā mujh se koī va.ada to nahīñ hai

thoḌī sī mohabbat hai ziyāda to nahīñ hai

uslūb-e-nazar se mirā mafhūm na samjhe

vo yaar mirā itnā bhī saada to nahīñ hai

āġhāz jo kī maiñ ne na.ī ek mohabbat

ye pichhlī mohabbat kā i.aada to nahīñ hai

siine meñ bujhā jaatā hai dil merā sar-e-shām

is ġham kā ilaaj ātish-e-bāda to nahīñ hai

phir se tirī āñkhoñ meñ sivā rang-e-mohabbat

phir tark-e-mohabbat kā irāda to nahīñ hai

parvāz ke sab ḳhvāb yahīñ rakkhe haiñ maiñ ne

go kunj-e-qafas itnā kushāda to nahīñ hai

ḳhānoñ meñ bhaTaktā nazar aayā mujhe insān

shatranj zamāna kā piyāda to nahīñ hai

jaate haiñ kahīñ aur pahuñchte haiñ kahīñ aur

ik aur bhī jaada pas-e-jāda to nahīñ hai

un aankhon ka mujh se koi wada to nahin hai

thoDi si mohabbat hai ziyaada to nahin hai

uslub-e-nazar se mera mafhum na samjhe

wo yar mera itna bhi sada to nahin hai

aaghaz jo ki main ne nai ek mohabbat

ye pichhli mohabbat ka iada to nahin hai

sine mein bujha jata hai dil mera sar-e-sham

is gham ka ilaj aatish-e-baada to nahin hai

phir se teri aankhon mein siwa rang-e-mohabbat

phir tark-e-mohabbat ka irada to nahin hai

parwaz ke sab KHwab yahin rakkhe hain main ne

go kunj-e-qafas itna kushada to nahin hai

KHanon mein bhaTakta nazar aaya mujhe insan

shatranj zamana ka piyaada to nahin hai

jate hain kahin aur pahunchte hain kahin aur

ek aur bhi jada pas-e-jada to nahin hai