un buton se rabt toDa chahiye

un butoñ se rabt toḌā chāhiye

chāhiye ab un ko thoḌā chāhiye

qahba-e-duniyā ko chhoḌā chāhiye

rabt is luulī se toḌā chāhiye

kis zabāñ se mohtasib tū ne kahā

sāġhar-o-mīnā ko toḌā chāhiye

ḳhanda-zan hai mastī-e-mai-ḳhvār par

shīsha-e-sahbā ko toḌā chāhiye

us bat-e-mai ne kiyā ham ko zalīl

us kī gardan ko maroḌā chāhiye

jī meñ hai sair-e-falak ko jaa.eñ ham

bāda-e-gul-gūñ kā ghoḌā chāhiye

hai ḳhirāmāñ naaz se mauj-e-nasīm

nik.hat-e-gul kā ye ghoḌā chāhiye

donoñ āñkheñ kyuuñ na hoñ dil ko aziiz

āhuoñ kā mujh ko joḌā chāhiye

gar nishān-e-manzil-e-jānāñ mile

phir qadam pīchhe na moḌā chāhiye

ek muddat meñ baḌhāyā tū ne rabt

ab ghaTānā thoḌā thoḌā chāhiye

zulmat-e-shab se hai zīnat maah kī

zulf ko aariz pe chhoḌā chāhiye

TuuTe dil ko momiyā-e-lutf se

ho agar taufīq joḌā chāhiye

kyuuñ shahīdoñ kā kafan hove safed

un ke tan par laal joḌā chāhiye

hai jo fikr-e-shāh aa.alī silsila

ālam-e-ma.anī se joḌā chāhiye

koh to tesha se TuuTā kohkan

koshak-e-ḳhusrav bhī toḌā chāhiye

paḌ ga.ī chakkar meñ kashtī nā-ḳhudā

ab ḳhudā par is ko chhoḌā chāhiye

gar samand-e-nāz par tū ho savār

zulf kā hāthoñ meñ koḌā chāhiye

khul gayā mujh se jo ik band-e-qabā

bole us kā haath toḌā chāhiye

us kī zulfoñ ko saperā dekh le

gar use kāloñ kā joḌā chāhiye

ganj-e-husn us kā hai ruḳh aur maar zulf

ganj par kāloñ kā joḌā chāhiye

bād-pā hai ablaq-e-chashm-e-siyāh

kyā use kājal kā koḌā chāhiye

mārtā bulbul ko hai kyuuñ bāġhbāñ

kaan gul kā bhī maroḌā chāhiye

hai chaman meñ āmad-e-fasl-e-bahār

ab dar-e-zindāñ ko toḌā chāhiye

hai bahār aa.ī qabā-e-gul se ab

bulbuloñ ko laal joḌā chāhiye

gul bhī un ko ḳhaar aate haiñ nazar

hāsidoñ kī aañkh phoḌā chāhiye

maiñ huuñ aasī muñh meñ mere vaqt-e-naz.a

dāman-e-tar ko nichoḌā chāhiye

rah chukā tan ke qafas meñ ye bahut

ruuh ke taa.ir ko chhoḌā chāhiye

ho agar na sar meñ saudā 'ishq kā

phir use patthar se phoḌā chāhiye

haath meñ ai gul-badan mehñdī lagā

panja-e-marjāñ maroḌā chāhiye

kaun sī mushkil hai jo āsāñ na ho

dil meñ istiqlāl thoḌā chāhiye

manzil-e-mulk-e-baqā meñ 'mashriqī'

dāman-e-nānak na chhoḌā chāhiye

un buton se rabt toDa chahiye

chahiye ab un ko thoDa chahiye

qahba-e-duniya ko chhoDa chahiye

rabt is luli se toDa chahiye

kis zaban se mohtasib tu ne kaha

saghar-o-mina ko toDa chahiye

KHanda-zan hai masti-e-mai-KHwar par

shisha-e-sahba ko toDa chahiye

us bat-e-mai ne kiya hum ko zalil

us ki gardan ko maroDa chahiye

ji mein hai sair-e-falak ko jaen hum

baada-e-gul-gun ka ghoDa chahiye

hai KHiraman naz se mauj-e-nasim

nikhat-e-gul ka ye ghoDa chahiye

donon aankhen kyun na hon dil ko aziz

aahuon ka mujh ko joDa chahiye

gar nishan-e-manzil-e-jaanan mile

phir qadam pichhe na moDa chahiye

ek muddat mein baDhaya tu ne rabt

ab ghaTana thoDa thoDa chahiye

zulmat-e-shab se hai zinat mah ki

zulf ko aariz pe chhoDa chahiye

TuTe dil ko momiya-e-lutf se

ho agar taufiq joDa chahiye

kyun shahidon ka kafan howe safed

un ke tan par lal joDa chahiye

hai jo fikr-e-shah aaali silsila

aalam-e-mani se joDa chahiye

koh to tesha se TuTa kohkan

koshak-e-KHusraw bhi toDa chahiye

paD gai chakkar mein kashti na-KHuda

ab KHuda par is ko chhoDa chahiye

gar samand-e-naz par tu ho sawar

zulf ka hathon mein koDa chahiye

khul gaya mujh se jo ek band-e-qaba

bole us ka hath toDa chahiye

us ki zulfon ko sapera dekh le

gar use kalon ka joDa chahiye

ganj-e-husn us ka hai ruKH aur mar zulf

ganj par kalon ka joDa chahiye

baad-pa hai ablaq-e-chashm-e-siyah

kya use kajal ka koDa chahiye

marta bulbul ko hai kyun baghban

kan gul ka bhi maroDa chahiye

hai chaman mein aamad-e-fasl-e-bahaar

ab dar-e-zindan ko toDa chahiye

hai bahaar aai qaba-e-gul se ab

bulbulon ko lal joDa chahiye

gul bhi un ko KHar aate hain nazar

hasidon ki aankh phoDa chahiye

main hun aasi munh mein mere waqt-e-naza

daman-e-tar ko nichoDa chahiye

rah chuka tan ke qafas mein ye bahut

ruh ke tair ko chhoDa chahiye

ho agar na sar mein sauda 'ishq ka

phir use patthar se phoDa chahiye

hath mein ai gul-badan mehndi laga

panja-e-marjaan maroDa chahiye

kaun si mushkil hai jo aasan na ho

dil mein istiqlal thoDa chahiye

manzil-e-mulk-e-baqa mein 'mashriqi'

daman-e-nanak na chhoDa chahiye