ان دنوں میری یاری تھی صحراؤں سے باغ میں کوئی دن بھی میں جاتا نہ تھا

ان دنوں میری یاری تھی صحراؤں سے باغ میں کوئی دن بھی میں جاتا نہ تھا

خوف آتا تھا لہروں سے بے حد مجھے اور دریا بھی ساحل پہ آتا نہ تھا

میں نے تنہائی میں کاٹ دی زندگی یار غم خوار کوئی نہیں تھا مرا

بولنے کی سکت مجھ میں تھی ہی نہیں اور ویسے بھی کوئی بلاتا نہ تھا

ایک دن اس کی آنکھوں نے سب پڑھ لیے دل صحیفے پہ لکھے ہوئے واقعے

جو بھلائے نہیں جا سکے تھے کبھی جو زباں پر تھے لیکن سناتا نہ تھا

خواب مرتے تو اعلان کرتا تھا میں اور خود سے لپٹتا تھا روتے ہوئے

ایک دنیا تمنائی تھی اور میں وہ جنازے کسی کو دکھاتا نہ تھا

کیا تجھے یاد ہے اے مرے زرد رو ان دنوں تیرا شیدائی ہوتا تھا میں

جب ترے جسم پر موسم سبز تھا کوئی پھر بھی ترے گیت گاتا نہ تھا