un dinon meri yari thi sahraon se bagh mein koi din bhi main jata na tha

un dinoñ merī yaarī thī sahrāoñ se baaġh meñ koī din bhī maiñ jaatā na thā

ḳhauf aatā thā lahroñ se behad mujhe aur dariyā bhī sāhil pe aatā na thā

maiñ ne tanhā.ī meñ kaaT dī zindagī yaar ġham-ḳhvār koī nahīñ thā mirā

bolne kī sakat mujh meñ thī hī nahīñ aur vaise bhī koī bulātā na thā

ek din us kī āñkhoñ ne sab paḌh liye dil sahīfe pe likkhe hue vāqa'e

jo bhulā.e nahīñ jā sake the kabhī jo zabāñ par the lekin sunātā na thā

ḳhvāb marte to e'lān kartā thā maiñ aur ḳhud se lipaTtā thā rote hue

ek duniyā tamannā.ī thī aur maiñ vo janāze kisī ko dikhātā na thā

kyā tujhe yaad hai ai mire zard-rū un dinoñ terā shaidā.ī hotā thā maiñ

jab tire jism par mausam-e-sabz thā koī phir bhī tire giit gaatā na thā

un dinon meri yari thi sahraon se bagh mein koi din bhi main jata na tha

KHauf aata tha lahron se behad mujhe aur dariya bhi sahil pe aata na tha

main ne tanhai mein kaT di zindagi yar gham-KHwar koi nahin tha mera

bolne ki sakat mujh mein thi hi nahin aur waise bhi koi bulata na tha

ek din us ki aankhon ne sab paDh liye dil sahife pe likkhe hue waqa'e

jo bhulae nahin ja sake the kabhi jo zaban par the lekin sunata na tha

KHwab marte to e'lan karta tha main aur KHud se lipaTta tha rote hue

ek duniya tamannai thi aur main wo janaze kisi ko dikhata na tha

kya tujhe yaad hai ai mere zard-ru un dinon tera shaidai hota tha main

jab tere jism par mausam-e-sabz tha koi phir bhi tere git gata na tha