un ka barbaad-e-karam kahne ke qabil ho gaya

un kā barbād-e-karam kahne ke qābil ho gayā

dard pahlū meñ jahāñ bhī thā vahīñ dil ho gayā

bārhā dekhā hai dil ne o mire mahv-e-ḳhirām

hashr uTThā aur tire qadmoñ meñ shāmil ho gayā

dil jahāñ uchhlā fazā-e-do-jahāñ par chhā gayā

arsa-e-kaunain jab simTā mirā dil ho gayā

be-ḳhabar rahnā hī achchhā is jahān-e-ġhair meñ

miT gayā jo vāqif-e-ādāb-e-mahfil ho gayā

jo nigāh-e-shauq uTThī husn ban kar rah ga.ī

jo qadam ham ne uThāyā naqsh-e-manzil ho gayā

yā kabhī manzil thī maqsūd-e-mazāq-e-justujū

yā mazāq-e-justujū maqsūd-e-manzil ho gayā

haa.e 'bāsit' ye mire ḳhūn-e-tamannā kā asar

aur bhī rañgīn kuchh dāmān-e-qātil ho gayā

un ka barbaad-e-karam kahne ke qabil ho gaya

dard pahlu mein jahan bhi tha wahin dil ho gaya

barha dekha hai dil ne o mere mahw-e-KHiram

hashr uTTha aur tere qadmon mein shamil ho gaya

dil jahan uchhla faza-e-do-jahan par chha gaya

arsa-e-kaunain jab simTa mera dil ho gaya

be-KHabar rahna hi achchha is jahan-e-ghair mein

miT gaya jo waqif-e-adab-e-mahfil ho gaya

jo nigah-e-shauq uTThi husn ban kar rah gai

jo qadam hum ne uThaya naqsh-e-manzil ho gaya

ya kabhi manzil thi maqsud-e-mazaq-e-justuju

ya mazaq-e-justuju maqsud-e-manzil ho gaya

hae 'basit' ye mere KHun-e-tamanna ka asar

aur bhi rangin kuchh daman-e-qatil ho gaya