un ke dar pe aankh bichhae baiThe hain

un ke dar pe aañkh bichhā.e baiThe haiñ

be-matlab kī aas lagā.e baiThe haiñ

saare āshiq sar ke bal aur do-zānū

gahrī soch meñ ġhota khaa.e baiThe haiñ

mat jā un ke dar dīvāne pañkh pasār

vo yādoñ kī sham.a jalā.e baiThe haiñ

qurbānī kā shauq agar hai be-shak jā

vo ḳhanjar par dhaar lagā.e baiThe haiñ

un kī ġhazleñ un kī nazmeñ chhoḌo yaar

ustādoñ ke sher churā.e baiThe haiñ

khel shā.irī kā un ke sañg lā-hāsil

vo sar par dīvān uThā.e baiThe haiñ

nā-mumkin hai ho paa.e dīdār un kā

vo palkoñ ko aaḌ lagā.e baiThe haiñ

pyaar ke raste mat jaanā o malik 'azīm'

ranj-o-ġham sab ghaat lagā.e baiThe haiñ

un ke dar pe aankh bichhae baiThe hain

be-matlab ki aas lagae baiThe hain

sare aashiq sar ke bal aur do-zanu

gahri soch mein ghota khae baiThe hain

mat ja un ke dar diwane pankh pasar

wo yaadon ki shama jalae baiThe hain

qurbani ka shauq agar hai be-shak ja

wo KHanjar par dhaar lagae baiThe hain

un ki ghazlen un ki nazmen chhoDo yar

ustadon ke sher churae baiThe hain

khel shairi ka un ke sang la-hasil

wo sar par diwan uThae baiThe hain

na-mumkin hai ho pae didar un ka

wo palkon ko aaD lagae baiThe hain

pyar ke raste mat jaana o malik 'azim'

ranj-o-gham sab ghat lagae baiThe hain