un ke jate hi ye wahshat ka asar dekha kiye

un ke jaate hī ye vahshat kā asar dekhā kiye

sū-e-dar dekhā to pahroñ sū-e-dar dekhā kiye

dil ko vo kyā dekhte soz-e-jigar dekhā kiye

lag rahī thī aag jis ghar meñ vo ghar dekhā kiye

un kī mahfil meñ unheñ sab raat bhar dekhā kiye

ek ham hī the ki ik ik kī nazar dekhā kiye

tum sirhāne se ghaḌī bhar ke liye muñh pher lo

dam na niklegā mirī sūrat agar dekhā kiye

maiñ kuchh is hālat se un ke sāmne pahuñchā ki vo

go mirī sūrat se nafrat thī magar dekhā kiye

fā.eda kyā aisī shirkat se adū kī bazm meñ

tum udhar dekhā kiye aur ham udhar dekhā kiye

shaam se ye thī tire bīmār kī hālat ki log

raat bhar uTh uTh ke āsār-e-sahar dekhā kiye

bas hī kyā thā be-zabāñ kahte bhī kyā sayyād se

yaas kī nazroñ se muḌ kar apnā ghar dekhā kiye

maut aa kar sāmne se le ga.ī bīmār ko

dekhiye chāragaroñ ko chāra-gar dekhā kiye

raat bhar taḌpā kiyā hai dard-e-furqat se 'qamar'

pūchh lo tāroñ se taare raat bhar dekhā kiye

un ke jate hi ye wahshat ka asar dekha kiye

su-e-dar dekha to pahron su-e-dar dekha kiye

dil ko wo kya dekhte soz-e-jigar dekha kiye

lag rahi thi aag jis ghar mein wo ghar dekha kiye

un ki mahfil mein unhen sab raat bhar dekha kiye

ek hum hi the ki ek ek ki nazar dekha kiye

tum sirhane se ghaDi bhar ke liye munh pher lo

dam na niklega meri surat agar dekha kiye

main kuchh is haalat se un ke samne pahuncha ki wo

go meri surat se nafrat thi magar dekha kiye

faeda kya aisi shirkat se adu ki bazm mein

tum udhar dekha kiye aur hum udhar dekha kiye

sham se ye thi tere bimar ki haalat ki log

raat bhar uTh uTh ke aasar-e-sahar dekha kiye

bas hi kya tha be-zaban kahte bhi kya sayyaad se

yas ki nazron se muD kar apna ghar dekha kiye

maut aa kar samne se le gai bimar ko

dekhiye chaaragaron ko chaara-gar dekha kiye

raat bhar taDpa kiya hai dard-e-furqat se 'qamar'

puchh lo taron se tare raat bhar dekha kiye