un ke jalwon ki tasawwur mein farawani hai aaj

un ke jalvoñ kī tasavvur meñ farāvānī hai aaj

jis jagah maiñ huuñ vahāñ har chiiz nūrānī hai aaj

un kā jalva kār-farmā hai kisī ke husn meñ

ishq phir halqa-ba-gosh-e-husn-e-insānī hai aaj

izn-e-mai-noshī hai phir saaqī kī chashm-e-mast se

ham ne tauba toḌ kar piine kī phir Thānī hai aaj

ab to piine se sivā haiñ laġhzishoñ meñ lazzateñ

kyoñ ki ḳhud saaqī kī mastoñ par nigahbānī hai aaj

qissa-e-māzī hai goyā lan-tarānī kī sadā

har taraf pesh-e-nazar ik nūr-e-yazdānī hai aaj

yuuñ ba-qadr-e-kasr-e-isyāñ hai rahmat kā nuzūl

maiñ ne tauba kī thī tauba par pashemānī hai aaj

aa rahe haiñ sāmne vaa.iz ke poshīda gunāh

parda-e-rahmat meñ merī chāk-dāmānī hai aaj

kis qadar maflūj the ab tak havādis se havās

baa'd muddat ham ne apnī shakl pahchānī hai aaj

'āshiq' o 'mahtāb' o ‘muztar' 'shād' 'āzurdā' 'ḳhalīq'

'kaif' o 'sādiq' haiñ 'shifā' mahv-e-ġhazal-ḳhvānī hai aaj

un ke jalwon ki tasawwur mein farawani hai aaj

jis jagah main hun wahan har chiz nurani hai aaj

un ka jalwa kar-farma hai kisi ke husn mein

ishq phir halqa-ba-gosh-e-husn-e-insani hai aaj

izn-e-mai-noshi hai phir saqi ki chashm-e-mast se

hum ne tauba toD kar pine ki phir Thani hai aaj

ab to pine se siwa hain laghzishon mein lazzaten

kyon ki KHud saqi ki maston par nigahbani hai aaj

qissa-e-mazi hai goya lan-tarani ki sada

har taraf pesh-e-nazar ek nur-e-yazdani hai aaj

yun ba-qadr-e-kasr-e-isyan hai rahmat ka nuzul

main ne tauba ki thi tauba par pashemani hai aaj

aa rahe hain samne waiz ke poshida gunah

parda-e-rahmat mein meri chaak-damani hai aaj

kis qadar mafluj the ab tak hawadis se hawas

ba'd muddat hum ne apni shakl pahchani hai aaj

'ashiq' o 'mahtab' o ‘muztar' 'shad' 'azurda' 'KHaliq'

'kaif' o 'sadiq' hain 'shifa' mahw-e-ghazal-KHwani hai aaj