ان کے جلوؤں کی تصور میں فراوانی ہے آج

ان کے جلوؤں کی تصور میں فراوانی ہے آج

جس جگہ میں ہوں وہاں ہر چیز نورانی ہے آج

ان کا جلوہ کار فرما ہے کسی کے حسن میں

عشق پھر حلقہ بگوش حسن انسانی ہے آج

اذن مے نوشی ہے پھر ساقی کی چشم مست سے

ہم نے توبہ توڑ کر پینے کی پھر ٹھانی ہے آج

اب تو پینے سے سوا ہیں لغزشوں میں لذتیں

کیوں کہ خود ساقی کی مستوں پر نگہبانی ہے آج

قصۂ ماضی ہے گویا لن ترانی کی صدا

ہر طرف پیش نظر اک نور یزدانی ہے آج

یوں بقدر کسر عصیاں ہے رحمت کا نزول

میں نے توبہ کی تھی توبہ پر پشیمانی ہے آج

آ رہے ہیں سامنے واعظ کے پوشیدہ گناہ

پردۂ رحمت میں میری چاک دامانی ہے آج

کس قدر مفلوج تھے اب تک حوادث سے حواس

بعد مدت ہم نے اپنی شکل پہچانی ہے آج

عاشقؔ و مہتابؔ و مضطرؔ شادؔ آزردہؔ خلیقؔ

کیفؔ و صادقؔ ہیں شفاؔ محو غزل خوانی ہے آج