un ke jalwon pe hama-waqt nazar hoti hai

un ke jalvoñ pe hama-vaqt nazar hotī hai

kūcha-e-yār meñ yuuñ apnī basar hotī hai

jaane kyā chiiz mohabbat kī nazar hotī hai

vo jidhar hote haiñ duniyā hī udhar hotī hai

hosh vaale merī vahshat ko bhalā kyā samjheñ

un ke dīvānoñ ko aalam kī ḳhabar hotī hai

ishq meñ chāñd-sitāroñ kī haqīqat kyā ho

jalva-e-yār pe qurbān sahar hotī hai

aap kī yaad se hotā hai mirā dil raushan

aap ko dekh ke bedār nazar hotī hai

merī un ko na ḳhabar ho ye koī baat nahīñ

un ko to saare zamāne kī ḳhabar hotī hai

jazba-e-ishq meñ jannat kī tamannā kaisī

ye bulandī to mirī gard-e-safar hotī hai

hech hotī hai nigāhoñ meñ matā-e-kaunain

mere dilbar kī nazar jab bhī idhar hotī hai

mere dāman meñ samā jaate haiñ donoñ aalam

mere jānāñ kī nazar jab bhī idhar hotī hai

aur kyā hogī mire ishq kī me.arāj 'fanā'

zindagī yaar ke qadmoñ meñ basar hotī hai

un ke jalwon pe hama-waqt nazar hoti hai

kucha-e-yar mein yun apni basar hoti hai

jaane kya chiz mohabbat ki nazar hoti hai

wo jidhar hote hain duniya hi udhar hoti hai

hosh wale meri wahshat ko bhala kya samjhen

un ke diwanon ko aalam ki KHabar hoti hai

ishq mein chand-sitaron ki haqiqat kya ho

jalwa-e-yar pe qurban sahar hoti hai

aap ki yaad se hota hai mera dil raushan

aap ko dekh ke bedar nazar hoti hai

meri un ko na KHabar ho ye koi baat nahin

un ko to sare zamane ki KHabar hoti hai

jazba-e-ishq mein jannat ki tamanna kaisi

ye bulandi to meri gard-e-safar hoti hai

hech hoti hai nigahon mein mata-e-kaunain

mere dilbar ki nazar jab bhi idhar hoti hai

mere daman mein sama jate hain donon aalam

mere jaanan ki nazar jab bhi idhar hoti hai

aur kya hogi mere ishq ki mearaj 'fana'

zindagi yar ke qadmon mein basar hoti hai