unki aamad se main shadan ho gaya

un kī aamad se maiñ shādāñ ho gayā

aate hī har sū charāġhāñ ho gayā

dil ne āhista kahā mujh se yahī

ab to vasl-e-jān-e-jānāñ ho gayā

ishq jo us bevafā se ho gayā

dil ke bahlāne kā sāmāñ ho gayā

husn jo dekhā but-e-bedād kā

jo bhī thā us kā sanā-ḳhvāñ ho gayā

allah allah husn kā kahnā hai kyā

mehr-o-mah bhī is se tābāñ ho gayā

vo ga.e aur dard-e-furqat de ga.e

jaate jaate dīda-giryāñ ho gayā

choT ik dil par lagī TukḌe huā

diida merā ashk-e-bārāñ ho gayā

ashk jo niklā firāq-e-yār meñ

gaal par aayā to marjāñ ho gayā

jab milā mujh ko na 'ahqar' shuġhl kuchh

bazm meñ aa kar ġhazal-ḳhvāñ ho gayā

un ki aamad se main shadan ho gaya

aate hi har su charaghan ho gaya

dil ne aahista kaha mujh se yahi

ab to wasl-e-jaan-e-jaanan ho gaya

ishq jo us bewafa se ho gaya

dil ke bahlane ka saman ho gaya

husn jo dekha but-e-bedad ka

jo bhi tha us ka sana-KHwan ho gaya

allah allah husn ka kahna hai kya

mehr-o-mah bhi is se taban ho gaya

wo gae aur dard-e-furqat de gae

jate jate dida-giryan ho gaya

choT ek dil par lagi TukDe hua

dida mera ashk-e-baran ho gaya

ashk jo nikla firaq-e-yar mein

gal par aaya to marjaan ho gaya

jab mila mujh ko na 'ahqar' shughl kuchh

bazm mein aa kar ghazal-KHwan ho gaya