unki aankhon mein nasib apna munawwar dekha

un kī āñkhoñ meñ nasīb apnā munavvar dekhā

ek do baar nahīñ ḳhvāb ye aksar dekhā

choT dil par lagī ehsās ko zaḳhmī paayā

phuul se haath meñ jab bhī koī patthar dekhā

maiñ to bas dhun meñ tirī chaltā rahā chaltā rahā

raah meñ dasht hī dekhā na samundar dekhā

tujh se milte ye muqaddar meñ kahāñ thā lekin

zindagī ham ne tujhe ḳhvāb meñ aksar dekhā

itnā thā tark-e-ta'alluq meñ ta'alluq us ne

jaate jaate mujhe har gaam pe muḌ kar dekhā

zindagānī ko kahāñ tak hai zarūrat un kī

saath rah kar to kabhī un se bichhaḌ kar dekhā

log aate haiñ Thaharte haiñ chale jaate haiñ

ye tamāshā-e-jahāñ ham ne barābar dekhā

us ne phir terī tamanna hī kahāñ kī jis ne

zindagī tujh ko kabhī ġhaur se paḌh kar dekhā

pyaas hī pyaas milī aur to kuchh bhī na milā

ham ne ai 'ishq tirī raah pe chal kar dekhā

tū na aa.egā mire dil ko yaqīñ thā ai dost

rāsta ham ne tirā phir bhī to shab bhar dekhā

ġhair to ġhair haiñ apnoñ ko bhī ham ne 'gulshan'

vaqt paḌne pe badalte hue tevar dekhā

un ki aankhon mein nasib apna munawwar dekha

ek do bar nahin KHwab ye aksar dekha

choT dil par lagi ehsas ko zaKHmi paya

phul se hath mein jab bhi koi patthar dekha

main to bas dhun mein teri chalta raha chalta raha

rah mein dasht hi dekha na samundar dekha

tujh se milte ye muqaddar mein kahan tha lekin

zindagi hum ne tujhe KHwab mein aksar dekha

itna tha tark-e-ta'alluq mein ta'alluq us ne

jate jate mujhe har gam pe muD kar dekha

zindagani ko kahan tak hai zarurat un ki

sath rah kar to kabhi un se bichhaD kar dekha

log aate hain Thaharte hain chale jate hain

ye tamasha-e-jahan hum ne barabar dekha

us ne phir teri tamanna hi kahan ki jis ne

zindagi tujh ko kabhi ghaur se paDh kar dekha

pyas hi pyas mili aur to kuchh bhi na mila

hum ne ai 'ishq teri rah pe chal kar dekha

tu na aaega mere dil ko yaqin tha ai dost

rasta hum ne tera phir bhi to shab bhar dekha

ghair to ghair hain apnon ko bhi hum ne 'gulshan'

waqt paDne pe badalte hue tewar dekha