ان کی آنکھوں میں نصیب اپنا منور دیکھا

ان کی آنکھوں میں نصیب اپنا منور دیکھا

ایک دو بار نہیں خواب یہ اکثر دیکھا

چوٹ دل پر لگی احساس کو زخمی پایا

پھول سے ہاتھ میں جب بھی کوئی پتھر دیکھا

میں تو بس دھن میں تری چلتا رہا چلتا رہا

راہ میں دشت ہی دیکھا نہ سمندر دیکھا

تجھ سے ملتے یہ مقدر میں کہاں تھا لیکن

زندگی ہم نے تجھے خواب میں اکثر دیکھا

اتنا تھا ترک تعلق میں تعلق اس نے

جاتے جاتے مجھے ہر گام پہ مڑ کر دیکھا

زندگانی کو کہاں تک ہے ضرورت ان کی

ساتھ رہ کر تو کبھی ان سے بچھڑ کر دیکھا

لوگ آتے ہیں ٹھہرتے ہیں چلے جاتے ہیں

یہ تماشائے جہاں ہم نے برابر دیکھا

اس نے پھر تیری تمنا ہی کہاں کی جس نے

زندگی تجھ کو کبھی غور سے پڑھ کر دیکھا

پیاس ہی پیاس ملی اور تو کچھ بھی نہ ملا

ہم نے اے عشق تری راہ پہ چل کر دیکھا

تو نہ آئے گا مرے دل کو یقیں تھا اے دوست

راستہ ہم نے ترا پھر بھی تو شب بھر دیکھا

غیر تو غیر ہیں اپنوں کو بھی ہم نے گلشنؔ

وقت پڑنے پہ بدلتے ہوئے تیور دیکھا