unki bhi shararat to dekho hum ko hi kahoge doshi kya

un kī bhī sharārat to dekho ham ko hī kahoge doshī kyā

bardāsht se bāhar ho jaa.e to oḌhe koī ḳhamoshī kyā

jo apnī zaat meñ ḳhud-sar haiñ kyā un kā zamīr jhiñjhoḌe koī

zāhir par kaan na deñ jo unheñ bātin kī bhalā sargoshī kyā

duniyā kī banā.ī rasm hai ye jo ham ko nibhānī hai varna

nāzāñ jis par ḳhud gulshan ho us gul-ruḳh kī gul-poshī kyā

isrār na kar ai saaqī tū ye sāġhar-o-mīnā duur haTā

jis dil pe ġhamoñ kā qabza ho us par chhā.e mad.hoshī kyā

kyoñ chhoTī chhoTī bātoñ par hairān-o-pareshāñ hote ho

bedār agar hai ruuh to phir zehn-o-dil kī be-hoshī kyā

jis din tū kahegā maiñ us din sahrā kī jānib chal dūñgā

jo jaan luTātā ho tujh par use ḳhauf-e-ḳhāna-badoshī kyā

un ki bhi shararat to dekho hum ko hi kahoge doshi kya

bardasht se bahar ho jae to oDhe koi KHamoshi kya

jo apni zat mein KHud-sar hain kya un ka zamir jhinjhoDe koi

zahir par kan na den jo unhen baatin ki bhala sargoshi kya

duniya ki banai rasm hai ye jo hum ko nibhani hai warna

nazan jis par KHud gulshan ho us gul-ruKH ki gul-poshi kya

israr na kar ai saqi tu ye saghar-o-mina dur haTa

jis dil pe ghamon ka qabza ho us par chhae madhoshi kya

kyon chhoTi chhoTi baaton par hairan-o-pareshan hote ho

bedar agar hai ruh to phir zehn-o-dil ki be-hoshi kya

jis din tu kahega main us din sahra ki jaanib chal dunga

jo jaan luTata ho tujh par use KHauf-e-KHana-badoshi kya