unki nigah-e-naz ke qabil kahen jise

un kī nigāh-e-nāz ke qābil kaheñ jise

vo jins-e-mo'atabar ho atā dil kaheñ jise

shab-ḳhāna-e-hayāt kī raunaq hai aaj tak

vo raushnī faroġh ġham-e-dil kaheñ jise

kyā DhūñDte ho rah-rav-e-sarmāya-e-sukūñ

ma.adūm hai vo naqsh hī manzil kaheñ jise

ai iztirāb-e-mauj-o-talātum tire sivā

vaj.h-e-sukūñ vo kaun hai sāhil kaheñ jise

dīvāngī-e-ahl-e-junūñ par na jā.iye

shā.ista-e-yaqīñ hai vo ġhāfil kaheñ jise

me.arāj jis ko kahte haiñ sahrā-e-ishq kī

vo hai bagūla aaj bhī mahmil kaheñ jise

ġhunchoñ pe kyā guzar ga.ī sun kar ye kyā ḳhabar

vo lai ḳharosh-e-qalb-e-anādil kaheñ jise

mamnūn-e-iltifāt bhī aksar huā huuñ maiñ

us chashm-e-nīm-bāz kā qātil kaheñ jise

miltā kahāñ hai ai 'razā' be-shorish-e-junūñ

aisā sukūt garmī-e-mahfil kaheñ jise

un ki nigah-e-naz ke qabil kahen jise

wo jins-e-mo'atabar ho ata dil kahen jise

shab-KHana-e-hayat ki raunaq hai aaj tak

wo raushni farogh gham-e-dil kahen jise

kya DhunDte ho rah-raw-e-sarmaya-e-sukun

madum hai wo naqsh hi manzil kahen jise

ai iztirab-e-mauj-o-talatum tere siwa

wajh-e-sukun wo kaun hai sahil kahen jise

diwangi-e-ahl-e-junun par na jaiye

shaista-e-yaqin hai wo ghafil kahen jise

mearaj jis ko kahte hain sahra-e-ishq ki

wo hai bagula aaj bhi mahmil kahen jise

ghunchon pe kya guzar gai sun kar ye kya KHabar

wo lai KHarosh-e-qalb-e-anadil kahen jise

mamnun-e-iltifat bhi aksar hua hun main

us chashm-e-nim-baz ka qatil kahen jise

milta kahan hai ai 'raza' be-shorish-e-junun

aisa sukut garmi-e-mahfil kahen jise