unki qismat sanwarta hun main

un kī qismat sañvārtā huuñ maiñ

ek do logoñ kā ḳhudā huuñ maiñ

terī yādoñ ke par katar ke hī

dil ke piñjre ko kholtā huuñ maiñ

faisle dil se letā thā saare

zehn ke shahr meñ nayā huuñ maiñ

ḳhāmushī thā zabān vāloñ kī

be-zabānoñ kī ab sadā huuñ maiñ

kis ne āvāz dī hai pīchhe se

kis kī ḳhātir rukā huā huuñ maiñ

ġhāliban sochtā huuñ kaafī kam

kuchh ziyāda hī sochtā huuñ maiñ

ḳhud se aage nikal ke ai raahī

ḳhud ko āvāz de rahā huuñ maiñ

bārhā kartā huuñ hadeñ maiñ paar

phir kahīñ paañv dekhtā huuñ maiñ

jaane kitnoñ kī ho tumhīñ manzil

jaane kitnoñ kā rāstā huuñ maiñ

un ki qismat sanwarta hun main

ek do logon ka KHuda hun main

teri yaadon ke par katar ke hi

dil ke pinjre ko kholta hun main

faisle dil se leta tha sare

zehn ke shahr mein naya hun main

KHamushi tha zaban walon ki

be-zabanon ki ab sada hun main

kis ne aawaz di hai pichhe se

kis ki KHatir ruka hua hun main

ghaaliban sochta hun kafi kam

kuchh ziyaada hi sochta hun main

KHud se aage nikal ke ai rahi

KHud ko aawaz de raha hun main

barha karta hun haden main par

phir kahin panw dekhta hun main

jaane kitnon ki ho tumhin manzil

jaane kitnon ka rasta hun main