unki surat nazar nahin aati

un kī sūrat nazar nahīñ aatī

niiñd ai chashm-e-tar nahīñ aatī

kam huā jā rahā hai zauq-e-junūñ

fasl-e-gul kī ḳhabar nahīñ aatī

nazar aatā hai rang ashkoñ meñ

choT dil kī nazar nahīñ aatī

kyā ḳhafā ho ga.ī tajallī-e-dost

ab kabhī tuur par nahīñ aatī

aisī qismat kahāñ ki jaam aatā

bū-e-mai bhī idhar nahīñ aatī

jis meñ rahtā thā intizār un kā

ab vo shām-o-sahar nahīñ aatī

kyoñ phir itrā rahī hai bād-e-bahār

us galī se agar nahīñ aatī

vo hañsī phir rahī hai āñkhoñ meñ

aañkh kyoñ apnī bhar nahīñ aatī

haa.e kis kaam kī hai tū ai maut

kaam jab vaqt par nahīñ aatī

apne qaabū meñ ye tabī.at bhī

ab to do-do pahar nahīñ aatī

ḳhat kā aatā javāb kyā 'muztar'

ḳhabar-e-nāma-bar nahīñ aatī

un ki surat nazar nahin aati

nind ai chashm-e-tar nahin aati

kam hua ja raha hai zauq-e-junun

fasl-e-gul ki KHabar nahin aati

nazar aata hai rang ashkon mein

choT dil ki nazar nahin aati

kya KHafa ho gai tajalli-e-dost

ab kabhi tur par nahin aati

aisi qismat kahan ki jam aata

bu-e-mai bhi idhar nahin aati

jis mein rahta tha intizar un ka

ab wo sham-o-sahar nahin aati

kyon phir itra rahi hai baad-e-bahaar

us gali se agar nahin aati

wo hansi phir rahi hai aankhon mein

aankh kyon apni bhar nahin aati

hae kis kaam ki hai tu ai maut

kaam jab waqt par nahin aati

apne qabu mein ye tabiat bhi

ab to do-do pahar nahin aati

KHat ka aata jawab kya 'muztar'

KHabar-e-nama-bar nahin aati