un ko ruswa mujhe KHarab na kar

un ko rusvā mujhe ḳharāb na kar

ai dil itnā bhī iztirāb na kar

āmad-e-yār kī umiid na chhoḌ

dekh ai aañkh mail-e-ḳhvāb na kar

mil hī rahtī hai mai-parast ko mai

fikr-e-nā-yābi-e-sharāb na kar

nāsehā ham kareñge sharh-e-junūñ

dil-e-dīvāna se ḳhitāb na kar

shauq yāroñ kā be-shumār nahīñ

sitam ai dost be-hisāb na kar

dil ko mast-e-ḳhayāl-e-yār banā

lab ko ālūda-e-sharāb na kar

rakh bahar-hāl shaġhl-e-mai 'hasrat'

is meñ parvā-e-sheḳh-o-shāb na kar

un ko ruswa mujhe KHarab na kar

ai dil itna bhi iztirab na kar

aamad-e-yar ki umid na chhoD

dekh ai aankh mail-e-KHwab na kar

mil hi rahti hai mai-parast ko mai

fikr-e-na-yabi-e-sharab na kar

naseha hum karenge sharh-e-junun

dil-e-diwana se KHitab na kar

shauq yaron ka be-shumar nahin

sitam ai dost be-hisab na kar

dil ko mast-e-KHayal-e-yar bana

lab ko aaluda-e-sharab na kar

rakh bahar-haal shaghl-e-mai 'hasrat'

is mein parwa-e-sheKH-o-shab na kar