ان کو یہ چاہیے اک دم نہ بھلائیں ہم کو

ان کو یہ چاہیے اک دم نہ بھلائیں ہم کو

رفتہ رفتہ دل شیدا سے ہٹائیں ہم کو

ان کی یادوں کے علاوہ بھی بہت سے غم ہیں

ان سے کہنا کہ وہ اب یاد نہ آئیں ہم کو

یاد رکھے گا بھلا کون جفائیں تیری

زندہ رکھیں گی ہمیشہ یہ وفائیں ہم کو

زندہ رہنے کی تو امید نہیں تھی لیکن

موت کے منہ سے بچا لائیں دوائیں ہم کو

ہم دعا لے کے ہیں ماں باپ کی گھر سے نکلے

چھو نہیں سکتیں زمانہ کی بلائیں ہم کو

تلخ لگتی ہے بزرگوں کی ہدایات مگر

فائدہ دیتی ہیں کچھ کڑوی دوائیں ہم کو

جا کے پردیس میں الفت کو ترسنے کے سوا

اور ہجرت سے ملا کیا وہ بتائیں ہم کو

ہم تو ہیں عکسؔ چراغ فن افکار سخن

ہو ہواؤں میں اگر دم تو بجھائیں ہم کو