un ko ye chahiye ek dam na bhulaen hum ko

un ko ye chāhiye ik dam na bhulā.eñ ham ko

rafta rafta dil-e-shaidā se haTā.eñ ham ko

un kī yādoñ ke 'alāva bhī bahut se ġham haiñ

un se kahnā ki vo ab yaad na aa.eñ ham ko

yaad rakkhegā bhalā kaun jafā.eñ terī

zinda rakkheñgī hamesha ye vafā.eñ ham ko

zinda rahne kī to ummīd nahīñ thī lekin

maut ke muñh se bachā lā.īñ davā.eñ ham ko

ham du'ā le ke haiñ māñ-bāp kī ghar se nikle

chhū nahīñ saktīñ zamāne kī balā.eñ ham ko

talḳh lagtī hai buzurgoñ kī hidāyāt magar

fā.eda detī haiñ kuchh kaḌvī davā.eñ ham ko

jā ke pardes meñ ulfat ko tarasne ke sivā

aur hijrat se milā kyā vo batā.eñ ham ko

ham to haiñ 'aks' charāġh-e-fan-e-afkār-e-suḳhan

ho havāoñ meñ agar dam to bujhā.eñ ham ko

un ko ye chahiye ek dam na bhulaen hum ko

rafta rafta dil-e-shaida se haTaen hum ko

un ki yaadon ke 'alawa bhi bahut se gham hain

un se kahna ki wo ab yaad na aaen hum ko

yaad rakkhega bhala kaun jafaen teri

zinda rakkhengi hamesha ye wafaen hum ko

zinda rahne ki to ummid nahin thi lekin

maut ke munh se bacha lain dawaen hum ko

hum du'a le ke hain man-bap ki ghar se nikle

chhu nahin saktin zamane ki balaen hum ko

talKH lagti hai buzurgon ki hidayat magar

faeda deti hain kuchh kaDwi dawaen hum ko

ja ke pardes mein ulfat ko tarasne ke siwa

aur hijrat se mila kya wo bataen hum ko

hum to hain 'aks' charagh-e-fan-e-afkar-e-suKHan

ho hawaon mein agar dam to bujhaen hum ko