un nigahon ko ajab tarz-e-kalam aata hai

un nigāhoñ ko ajab tarz-e-kalām aatā hai

aisā lagtā hai bahāroñ kā payām aatā hai

marhala hotā hai jab dār-o-rasan kā darpesh

qur.a-e-fāl ham aisoñ hī ke naam aatā hai

ai mire nāseh-e-mushfiq kabhī ye bhī sochā

kaun duniyā meñ ḳhushī se tah-e-dām aatā hai

bāda-noshī meñ bhī hai kaif-e-sukūñ-baḳhsh magar

haa.e vo kaif jo be-minnat-e-jām aatā hai

apnī hañstī kā bhī ehsās jahāñ ho na sake

ālam-e-hosh meñ ik vo bhī maqām aatā hai

pesh-dastī hai ḳharābāt-e-jahāñ kā dastūr

takte rahne se kahīñ haath meñ jaam aatā hai

ahl-e-himmat ke hasīñ ḳhvāboñ kī niklī ta.abīr

ibn-e-ādam ko sitāroñ kā salām aatā hai

un nigahon ko ajab tarz-e-kalam aata hai

aisa lagta hai bahaaron ka payam aata hai

marhala hota hai jab dar-o-rasan ka darpesh

qura-e-fal hum aison hi ke nam aata hai

ai mere naseh-e-mushfiq kabhi ye bhi socha

kaun duniya mein KHushi se tah-e-dam aata hai

baada-noshi mein bhi hai kaif-e-sukun-baKHsh magar

hae wo kaif jo be-minnat-e-jam aata hai

apni hansti ka bhi ehsas jahan ho na sake

aalam-e-hosh mein ek wo bhi maqam aata hai

pesh-dasti hai KHarabaat-e-jahan ka dastur

takte rahne se kahin hath mein jam aata hai

ahl-e-himmat ke hasin KHwabon ki nikli tabir

ibn-e-adam ko sitaron ka salam aata hai