un se kah do ki ilaj-e-dil-e-shaida na karen

un se kah do ki ilāj-e-dil-e-shaidā na kareñ

yahī achchhā hai ki bīmār ko achchhā na kareñ

kyā kahā phir to kaho ham koī shikvā na kareñ

chup raheñ zulm saheñ zulm kā charchā na kareñ

ye tamāshā to kareñ ruḳh se uThā deñ vo naqāb

ek aalam ko magar mahv-e-tamāshā na kareñ

vaqt-e-āḳhir to nikal jaa.e tamannā merī

vo na aise meñ bhī aa.eñ kahīñ aisā na kareñ

intihā ho ga.ī āzād-dahī kī sayyād

ham tasavvur meñ bhī gulzār ko dekhā na kareñ

roz vo kahte haiñ aaj ā.eñge kal ā.eñge

aise va.ade se to behtar hai ki va.adā na kareñ

ḳhud-numā.ī unheñ ġhairoñ meñ liye phirtī hai

ham to jab jāneñ ki ham se bhī vo pardā na kareñ

teġh ruk jaatī hai nāvak bhī bahak jaatā hai

koī 'bismil' ko ye samjhā de ki taḌpā na kareñ

un se kah do ki ilaj-e-dil-e-shaida na karen

yahi achchha hai ki bimar ko achchha na karen

kya kaha phir to kaho hum koi shikwa na karen

chup rahen zulm sahen zulm ka charcha na karen

ye tamasha to karen ruKH se uTha den wo naqab

ek aalam ko magar mahw-e-tamasha na karen

waqt-e-aKHir to nikal jae tamanna meri

wo na aise mein bhi aaen kahin aisa na karen

intiha ho gai aazad-dahi ki sayyaad

hum tasawwur mein bhi gulzar ko dekha na karen

roz wo kahte hain aaj aaenge kal aaenge

aise wade se to behtar hai ki wada na karen

KHud-numai unhen ghairon mein liye phirti hai

hum to jab jaanen ki hum se bhi wo parda na karen

tegh ruk jati hai nawak bhi bahak jata hai

koi 'bismil' ko ye samjha de ki taDpa na karen